АВТО-МОТО-Тест: Kia XCeed 1.6 Plug in Hybrid Executive-ЗА ПОЛЕСНА ТРАНЗИЦИЈА

МОДЕЛОТ XCEED PHEV НУДИ ОДЛИЧНО ИЗБАЛАНСИРАН КОМПРОМИС ПОМЕЃУ УДОБНОСТА, ДИНАМИКАТА И СЕКОЈДНЕВНАТА УПОТРЕБЛИВОСТ, ИСКЛУЧИТЕЛНО ВАЖНИ КАРАКТЕРИСТИКИ КОИ ДОАЃААT ВО АТРАКТИВЕН ПАКЕТ НА КРОСОВЕР АВТОМОБИЛ СО ДИЗАЈН НА КУПЕ

Од своето претставување во 2019 година XCeed е возило кое ги заматува линиите помеѓу SUV и хечбек автомобилите со умерено зголемена висина и груби пластични обвивки на каросеријата какви обично се сретнуваат кај SUV возилата. Во основа тоа е пример на најновиот тренд за создавање на нови подсегменти, манипулирајќи со типичните облици креирајќи вистински „crossover“ модел. Иако е дел од моделското семејство Ceed, изведбата XCeed како и PHEV варијантата е многу повеќе од колку што изгледа на прва.

МИНИМАЛНО ОСВЕЖУВАЊЕ

Како и остатокот од семејството и моделот XCeed е обновен за 2023 година, надградбите се мали но сепак важни. Лесно освежената каросерија добива предни светлосни групи со нова графика и браници кои се грижат за зголемување на ефикасноста, а тука е и новиот изглед на предна решетка. Страничната силуета не открива дополнителни разлики, освен поклопецот на предното лево крило под кој е сместен приклучокот за полнење на батеријата. Уникатниот заден дел ги имплементира впечатливите светлосни групи на кои исто како и на предниот дел е изменета графиката, додека благо ревидираниот облик на задниот браник ја заокружува сликата за новата естетика кај Xceed PHEV. Без оглед од кој агол се гледа, изгледот на автомобилот останува свеж и мудро обликуван, миксот на линии кои кокетираат со стиловите прават да се издвои во опкружувањето со силен карактер.

БЕЗ ПРЕТЕРУВАЊЕ

Во внатрешноста по „фејслифтот“ разликите остануваат релативно мали. Основниот дизајн е повеќе или помалку непроменет, кабината е доволно ергономски и логично изведена, а квалитетот на изработка е одличен. Изведбата XCeed PHEV доаѓа со одлични технолошки решенија и идеална комбинација помеѓу екрани и физички прекинувачи. Дигиталниот дел вклучува 12,3 инчен инструмент панел и новиот инфозабавен систем со екран од 10,25 инчи кој го користи најновиот софтвер на компанијата со цел за да ги обезбеди сите модерни функции. Како и досега, Android Auto и Apple CarPlay се вградени стандардно, системот на Kia е направен да работи совршено, додека менијата и иконите се логично поставени. Во поглед на комодитетот во кабинскиот дел, Xceed PHEV не остава простор за замерка, овој модел кај нас се нуди само во највисоко ниво на опременост, што подразбира комплетна возачка асистенција, дузина системи за активна и пасивна безбедност, како и естетски и функционални подобрувања за поголем конфор.

Единствената разлика се однесува на багажниот простор кој кај хибридната верзија е помал од стандардниот автомобил, па тука има капацитетот од 291 литри. Но, ниту тука не би требало да има забелешка, бидејќи електрификацијата го има заземено само делот под двојниот под од багажникот, така што на полицата има доволно место за куфери на едно четиричлено семејство.

ТЕХНИЧКИ КАРАКТЕРИСТИКИ НА ВОЗИЛОТО

EФИКАСНОСТ ВО ПРВ ПЛАН

Најголем интерес секако побудува хибридната моторизација која го придвижува тестираниот примерок. Атмосферскиот 1,6-литарски бензински агрегат работи по Аткинсов принцип, истискува 105 КС и располага со 147 Нм влечна сила. Овде се приклучува електричниот мотор кој произведува дополнителни 61 КС и 170 Нм влечна сила со што е овозможена комбинирана моќ од 141 КС и 265 Нм. За испраќање на силата кон предната оска ексклузивно е задолжен шестстепен автоматски менувач со двојна спојка. Системот може да обезбеди време до 100 км/ч од солидни 11 секунди и максимални 195 км/ч, но тоа не е во прв план кај овој модел. Eфикасноста е името на играта, а XCeed PHEV со својот пакет батерии од 8,9 kWh во реални услови може да помине нешто помалку од 50 километри само со користење на електрична енергија. Постигнување што не е далеку од официјалната бројка, која вели дека електро-дометот е максимални 60 километри. Ова значи дека можете да ги завршите повеќето дневни патувања исклучиво на електрична енергија, а доколку редовно ја дополнувате батеријата (за што се потребни 150 минути на полнач од 3,3 kW), можеби ќе можете да се приближите до официјалната просечна потрошувачка од 1,7 литри на 100 км. Се разбира, автомобилот може да се вози и со максимална брзина од 120 км/ч само во електро мод на работа, но во овој случај дистанцата е далеку пократка. Затоа е тука хибридниот режим, овозможувајќи одличен спој на својства од двете работни единици, нудејќи пристојни перформанси и одлична ефикасност која резултира со потрошувачка која не поминува 4 литри на 100 изминати километри. Од друга страна, доколку сакате да го извлечете максимумот потребно е да префрлите во спортскиот режим на работа каде бензинецот и електричниот мотор ќе можат да дојдат во полн израз, но не на сметка на потрошувачката, која се движи во зоната од 6 л/100км. Иако е поставен повисоко отколку стандарден „хечбек“ XCeed PHEV се вози речиси идентично, делувајќи доволно агилно во повеќето ситуации. Квалитетот во удобноста е задржан со вградување на помека суспензија која наведува кон порелаксирана секојдневна употреба, што е од особена корист во градски услови и на патишта кои не се идеално изведени.

Моделот XCeed PHEV едноставно е свој, неговиот микс на рафиниран квалитет, изразен дизајн, врвна технологија и минимални трошоци по изминат километар (доколку се користи како што е замислено) создава одлична прилика за сите кои не се подготвени да преминат од автомобил со мотор на внатрешно согоурување директно на електрично возило.

Данчо Здравковски