Најверојатно ова е предновогодишен подарок од Ауди или е подарок за Божиќ. Убав потег од Инголштад со кој воедно ја претставува својата иднина. Концепт спакуван во некој вид комбилимузина со купе линија. Целосно електрифицираното возило е долго 4,87 м, бројка која јасно кажува дека тоа е семејно купе со јасно нагласени четири седишта и пет врати. Во ширина се измерени 1,99 м, а во висина 1,46 м – купе лимузина, но со многу простор и сето тоа е еднакво на нешто луксузно зачинето со растојание меѓу оските од скоро три метри (2,95 м).
Во манир на легендарниот модел „кватро“, Ауди во „е концепт“ смести два електромотори, еден на предната, а другиот на задната оска, за погон на сите тркала. Нивната вкупна силина е еднаква на 775 коњи и повеќе од доволна да постигне 100 км/ч за 3,6 сек. Со 100 kWh батерија „ауди е концепт“ изминува 700 км, а потоа ако му се брза на возачот, за 10 мин. полнење батеријата може да акумулира електрична енергија доволна за дополнителни 370 км. Од електронско дигиталните уреди има речиси сѐ, почнувајќи од тие за безбедност до тие кои удобноста ја прават да биде уште подобра. Со „е концептот“ Ауди го покажува речиси сето свое умеење и остава простор за уште поголеми изненадувања кои наскоро ќе бидат претставени пред светската јавност со учеството во формула 1.
Поголем дел од тимот кој го создаваше ова купе, работел со години во Пекинг Дизајн Студио, оддел за обликување на автомобилите лоцирано во Кина. Таму дизајнерите вистински го почуствувале духот на кинеската култура, желбите и барањата на тамошните возачи. Оттука може слободно да кажеме дека Ауди подготвува купе лимузина за кинескиот пазар или со мали дополнувања и одземања, „е концепт“ да биде наменет за целиот свет. Сѐ е во игра. А ако нас нѐ прашувате, уште сега може да мине во сериско производство. Треба само да почекаме, да видиме дали производителот ќе го пушти концептот во производство или истиот ќе послужи за развој на идните модели.
ТОП НОВОСТИ
