Ауди отсекогаш правел караван изведба од своите лимузини и таа традиција ја продолжува и денес. Името „авант“ врзано за возилата со многу повеќе простор во одделот за товар започнува во 1977 и сѐ уште трае. Најновиот „авант“ е изведен од „шестката“, класика од лимузина. Тоа му доаѓа нешто како лаѓа на четири тркала со поголем товарен простор. Не е само товарниот простор и големината на автомобилот во прашање, туку и погонските единици, спортски навиеното подвозје кое сепак овозможува удобно патување и присуството на врвната технологија во секоја педа од автомобилот. И сето тоа спакувано во квалитетна завршна доработка крунисана со коефициент на отпор на воздухот од само 0,25. Ова со аеродинамиката, Ауди го нагласува како една од подобрите страни на возилото.
Сега „ауди а6 авант“ има должина од пет метри без еден сантиметар, односно 60 мм повеќе од претходникот. И растојанието меѓу оските е поголемо и сега изнесува 2,93 м, а одделот за товар располага со зафатнина од најмалку 503 и сѐ така до крајните 1.534 литри.
И како што отсекогаш било во концернот во кој е и Ауди, дизел моторите никогаш не биле напуштени и покрај големата пропагандна машинерија која до крајни граници ги рекламира електромобилите. 2,0 тди со 204 КС се вградува во новата „а шестка авант“, паралелно со двата бензински 2,0 тфси и 3,0 тфси. Јасно, овие мотори се во комбинација со системот „мхев плус“составен од три (два) дела, 48 волтна батерија и стартер генератор, односно умерена хибридна технологија. И сето ова за намалување на штетните издувни гасови. И додека другите производители на автомобили ги „фрлија“ дизел моторите, Ауди, односно групацијата Фолксваген сѐ уште „вози“ по старо. Умен потег.
ТОП НОВОСТИ
