Ауди некако ги среди бројките. Отсега натаму, автомобилите со мотори со внатрешно согорување ќе носат непарни, а електричните парни броеви. Да се знае што е што. Имаше мал хаос околу бројките и одговорните донесоа убаво и едноставно решение.
И сега новата генерација од популарниот модел „а 4“ со ото и дизел мотор носи ознака „а 5“. Ауди и натаму има дизел мотори во своите најнови модели и тоа во сета своја флота.
Тоа не е сѐ, Ауди подготви уште едно изненадување. Новата (електричната) „а четворка“ има пет врати, а се води како лимузина. Според нештата во автомобилската индустрија тоа е комбилимузина. Изведбата „авант“ задолжително си постои, само што ги „измешаа брзините“ со петте врати.
Штом ги спомнавме дизел моторите, ќе продолжиме со нив бидејќи и кај нас дизелите повеќе се барани. Четири цилиндри во линија со работна зафатнина од 2,0 литри и турбо компресор. Сето ова произведува 204 КС и максимален вртежен момент од 400 Нм. Преносот на силината оди само на предната или и на двете оски во изведбата со име „кватро“ и да не пропуштиме да ја спомнеме умерената 48 волти хибридна технологија. Две изведби, еден мотор, едната со погон само на предната оска, а другата со погон на двете оски со помош на автоматска менувачка кутија со двојна спојка.
Бензинските мотори поседуваат силина од 150, 204 и 367 КС. Тие 367 КС се резервирани за тие што носат ознака „с 5“.
„А 5“ има 67 мм повеќе во должина или вкупно 4.829 мм, поширок за 13 mm во ширина, „односно 1.860 мм и 68 мм овеќе во делот помеѓу оските (2.900 мм).
„Четворката“ со нејзините пет врати има товарен оддел со зафатнина од 445 л или 1.299 со спуштени задни седишта (потпирачот). Секако дека изведбата „авант“ има повеќе простор во одделот за товар – 476, односно 1.424 л.
Откако електрониката поевтини, сите производители тргнаа истата да ја вградуваат во возилата. И Ауди не е исклучок. Екраните осетливи на допир сега имаат некој мм повеќе во дијагонала, 11,9 инчи е „таблата со инструменти“, 14,5 инчи е повеќенаменскиот екран (средишниот), а има и за совозачот од 10,9 инчи, но е во понуда како опција, а не сериски. Ве интересира цената? Увозникот е надлежен за овој дел од приказната.
ТОП НОВОСТИ
