ЛАНИ 24-ЧАСОВНАТА ТРКА СЛАВЕШЕ 100 ГОДИНИ ОД ОДРЖУВАЊЕТО НА ПРВАТА ТРКА ВО 1923 ГОДИНА, А ГОДИНАВА ЌЕ ГО ДОЖИВЕЕ СВОЕТО 92. ИЗДАНИЕ. МНОГУ ИМИЊА, МНОГУ ТИМОВИ МИНАЛЕ НИЗ ОВОЈ МАРАТОН НА ТРКАЛА ВО КОЈ ВОЗАЧИТЕ ВОЗАТ ПОСТОЈАНО НА ГРАНИЦА НА ВОЗМОЖНОТО, А ТОА СЕ ОДНЕСУВА И НА ЦИЛИНДРИТЕ, СОПИРАЧКИТЕ, ШАСИИТЕ, ПНЕВМАТИЦИТЕ
Возење 24 часа со полна брзина е трка со исклучително исцрпувачко темпо. Трката 24 часа Ле Ман е една од неколкуте што се бодува во шампионатот на издржливост, но ниедна не е толку значајна како оваа што се вози во малото место Ле Ман на патеката Сарт, дел е посебно направена тркачка патека, а другиот дел е обичен регионален пат.
Трката Ле Ман е една од најстарите трки во светот, но и најзначајна бидејќи опстанала до денес. Не е исто да се победи на 24 часа Ле Ман и на некоја друга трка на издржливост. Постојат три легендарни трки, Ле Ман, Монако ГП и Инди 500. Последен што се обиде да ги освои сите три беше Фернандо Алонсо, кому му недостасува Инди 500. Засега само еден возач успеал да ја освои тројната круна, тоа е Грем Хил – Монако ГП (1963, 1964, 1965, 1968 и 1969), Индијанаполис 500 во 1966 година и 24 часа Ле Ман во 1972 година заедно со Анри Пескароло.
На 15 јуни ќе започне и на 16 јуни ќе заврши 92. издание на најпознатата трка на издржливост. Стартот на трката е закажан за 16:00 часот. Трката завршува по 24 часа, а не според правилата за извозени кругови. Најмногу победи на Ле Ман има Порше, дури 19, а најтрофеен возач е Том Кристенсен, наречен Мистер Ле Ман, со девет титули (1997, 2000 – 2005, 2008 и 2013). Ле Ман е посебна трка бидејќи се преплетуваат многу случки, анегдоти, радосни моменти, но за жал и трагични. Секој тркач, секој од тимовите сака да биде дел од таа слава, дел од титулата, дел од победничкиот тим.
Патеката Сарт е долга 13.626 м и 85 отсто од времето се вози со максимална силина. Тоа значи дека патеката е една од најбрзите на планетава. Позната е и по правиот дел долг огромни шест километри каде што возилата развиваат страшни брзини. Во 1988 година забележана е најголема брзина, фасцинантни 405 км/ч, постигната од Роже Дорчи од тимот Велтер Рејсинг со прототипот „ вм – пежо п 88“ на правиот дел попознат под името „мулзеин“. Сега на тој дел од патеката за постигнување поголема безбедност има шикана, така што брзината од 405 км/ч ќе остане засекогаш ненадмината.
Откако беа воспоставени нови правила, главни се тие од хипер класата, голем број производители што паузираа, повторно се вратија на патеката, на пример, Ферари, БМВ, Пежо, а има и нови – Ламборџини, но недостасува Форд. Тука се и Кадилак, Порше, Алпине, Изота Фрасчини и неизбежната Тојота.
На годинашново 92. издание ќе настапат и неколку познати возачи што некогаш возеле во Формула 1, на пример Роберт Кубица, најупорниот меѓу најупорните, Роман Гросжан, Камуи Кобајаши, Себастијан Буеми и Антонио Џованаци, но има и едно име Роман Сена де Анџелис, млад и многу талентиран возач, кој не е во роднинска врска со легендарниот Аиртон Сена или најголемиот пијанист и господин меѓу Ф1 тркачите, Елио де Анџелис. Исто и Марино Сато не е во роднински врски со некогашниот возач од Формула 1, Такума Сато. Но тука е најголемото име во мотоциклизмот Валентино Роси кој ќе настапи во класата „гт 3“ во тимот ВРТ со „бмв м 4“. Ќе возат и Мик Шумахер, синот на Мајкл Шумахер, и Оливер Кристенсен, синот на Том Кристенсен. Годинава на списокот на учесници не е Матијас Лауда, синот на легендарниот возач Ники Лауда.
Во класата „хипер автомобили“ на списокот има 23 екипи, во „лмп 2“ 18 (16, две екипи откажале) возила се пријавиле за старт, во „лм гт3“ има 23 екипажи подготвени да возат. На 15 јуни ќе стартуваат вкупно 62 возила поделени во три класи. Лани победи Ферари во кралската класа, а годинава Тојота, Пежо и другите ќе се обидат да му ја земат круната.
Билетите за трката се распродадени, единствено има слободни места за тренинг сесиите во среда, четврток и петок, 12, 13 и 14 јуни. Најевтиниот пакет билет за следење на трката 24 часа Ле Ман чини 141 евро, а важи од 12 до крајот на трката на 16 јуни.
ТОП НОВОСТИ
