15 хобија на богатите-АКТИВНОСТИ КОИ ДАВААТ ИНСПИРАЦИЈА

СТИЛОТ, НАЧИНОТ НА ЖИВЕЕЊЕ ГО ДЕФИНИРААТ АКТИВНОСТИТЕ ВО СЛОБОДНОТО ВРЕМЕ, КОИ ПРЕДИЗВИКУВААТ ЧУВСТВО НА ПРИЈАТНОСТ, ЗАРАДИ ЛИЧНО ЗАДОВОЛСТВО И РЕКРЕАЦИЈА, ИЛИ ХОБИЈА ШТО НИ ПОМАГААТ ДА СЕ ОПУШТИМЕ, ОЛАБАВИМЕ, ОСЛОБОДИМЕ ОД ФИЗИЧКАТА ИЛИ ПСИХИЧКАТА НАПНАТОСТ. ВО ИСТО ВРЕМЕ И ДА СЕ ЗАБАВУВАМЕ. НО, ТАКВИТЕ АКТИВНОСТИ НА БОГАТИТЕ СЕ РАЗЛИЧНИ, СЕКАКО И ПОСКАПИ. КАКО И ДА Е, ДЕЛУВААТ ИНСПИРАТИВНО

И обичните луѓе имаат хобија, се разбира. Уживаат во нив, имаат чувство на радост и задоволство кога се занимаваат со активностите што ги дефинираат како индивидуи, нивниот стил, начинот на живеење, како на пример возењето велосипед по кејот на реката, езерото, во блиската шума, планина, скијањето во нашата или соседните земји…

Но, богатите, оние што имаат префикс нај, се доста каприциозни. Всушност, такви се нивните барања, желби, па во таа смисла се и поинакви, различни, бидејќи можат да си ги дозволат. Едни на пример имаат екстравагантни хобија, необични, собираат реткости, уметнички предмети за колекција, вклучително и скапи автомобили, олдтајмери, други поседуваат јахти закотвени близу монденските плажи, трети ги обзема радост кога даруваат пари наменети за добротворство, кои служат за хумани, добротворни цели, обидувајќи се да им помогнат на оние што немале среќа во животот или работата, да стекнат големо богатство, и така, да им го направат светот поубаво место за живеење. Како-годе, хобијата на богатите, нивните активности, кои придонесуваат за опуштање, олабавување, ослободување од физичката или психичката напнатост, им даваат инспирација на обичните луѓе да се занимаваат со хобија што им ќе предизвикуваат исполнетост, ќе им даваат енергија, ќе ја „разгорат“ добрата мисла и слично.

Истражувавме малку и дознавме кои се петнаесетте хобија на богатите, оние што имаат префикс нај. По азбучен ред.

 АВТОМОБИЛИЗАМ

Брзото возење автомобили е омилено хоби на богатите и авантуристите, оние што имаат склоност кон авантури, што ризикуваат. Ги нарекуваат и ловци на среќа. Колку повеќе адреналин во крвта, толку подобро. Затоа и се натпреваруваат, возат тркачки автомобили. Некогаш им се доволни само два-три круга на тркачките патеки со нивните супермашини, од чии перформанси се завртува во главата, за потоа да се чувствуваат здрави, радосни, способни, среќни.., а возбудата е приказна за себе, нешто посебно. Од друга страна, автомобилизмот е скапо хоби. Освен што поседуваат брзи автомобили, богатите и плаќаат скапо за користење на тркачките патеките, таму каде што има. За неколку минути одвојуваат илјада долари, а кој сака возбудата да трае кратко!?

 ВИНАРСТВО

Богаташите знаат да уживаат во пиењето вино. Обично избираат скапи алкохолни пијалаци добиени со ферментација на сок од грозје, без оглед на видот – млади, црвени, бели, суви, десертни, пенливи, а и, секако, треба да бидат отстојани. Тие се нивни добри познавачи. Но, очигледно дека пиењето вино не им е доволно, па се одлучуваат да произведуваат и преработуваат. Едни поседуваат земјишта засадени со винови лози, а другите, кои живеат во велелепни куќи, задолжително имаат винарници, винарски визби. Може и обете бидејќи е нивна пасија.

ГОЛФ

Играта со мали тврди топки, односно со дрвени или железни кугли кои со специјални стапови се втеруваат во дупче преку разни вештачки пречки за едни е здодевна, за други забавна, занимлива, привлечна. Богатите и познатите личности од естрадата и политиката на пример ја фаворизираа, и тоа многу. Слободното време го користат да изиграат некоја партија. Не само што е скапа опремата, туку и наемот на голф-плацовите. Велат дека Клинт Иствуд не штеди кога е оваа игра во прашање, без оглед на возраста (има деведесет и една година), додека, пак, Доналд Трамп поседува неколку терени, цели ресорти, каде што минува дел од слободното време.

 ЕДРЕЊЕ

Пловењето со помош на едра е, исто така, омилено хоби на богатите, кое важи како фина, но и деликатна занимација, активност. Тие се добри едриличари, бестрашни бидејќи ги совладале тешкотиите што ги носи лошото време на отворено море. Поради големата скапотија (рентањето на мали едрилици, исто така, опремата…) не е достапно секому. Богатите уживаат додека крстосуваат, спортуваат. Еден од актерите што едрењето му е пасија е Американецот Џорџ Клуни. Често плови во Италија, на езерото Комо, каде што има вила.

 ЈАВАЊЕ

Коњичкиот спорт е, дефинитивно, еден од омилените на богаташите. Едноставно ги разонодува, им причинува задоволство, забава, разведрување. Повеќето имаат свои коњи, чистокрвни, често се поврзуваат со нив, емоционално, а и даваат големи пари за нивно дресирање. Поседувањето коњ не е ни малку евтино, затоа малкумина имаат таква привилегија. Јавањето е синоним на слободата.

 КОЛЕКЦИОНЕРСТВО

Страста за собирање на реткости, уметнички предмети… за колекција е занимливо хоби. Како правило, богаташите се и колекционери. Но, тоа не мора да значи, нужно, дека колекционерството е и скапо, доколку се собираат поштенски марки, значки на пример, а и нумизматичката колекција не чини големи пари. Богатите се страсни собирачи на часовници, накит, антиквитети, автомобили (класични, олдтајмери, спортски), некои се колекционери на воени авиони. За вкусот не се расправа, во секој случај. На почетокот не изискува многу средства, но, како се зголемува колекцијата, така растат и трошоците. Потрагата за реткости, уметнички предмети… е друга приказна, но факт е дека причинува задоволството.

 ЛОВ

На прв поглед, фаќањето или убивање дивеч со разни направи или со оружје изгледа обично, хоби што не е ни тренд, ниту, пак, луксуз, а и во шумата нема ништо скапоцено. Зависи како гледате на работите, секако. Но, вистината е поинаква. Ловот може да биде исклучително скап, до екстрем. Во зависност од земјата, за да се поседува ловечко оружје, може да се плати многу, па треба да се издвојат средства за данок на лов, потоа има трошоци за експедиција, и паричникот се празни брзо. За среќа, богаташите немаат проблем, знаат дека не можат да останат без пари, и затоа си го дозволуваат. Мора да се има предвид и фактот дека ловот на егзотични животни чини уште повеќе, цените се креваат до небо.

ОСВОЈУВАЊЕ ПЛАНИНСКИ ВРВОВИ

Додека многу спортови постојат одамна, со векови, планинарењето, т.е. качувањето на планина како спорт и рекреација, вклучително и освојувањето планински врвови, стана популарно во поново време, а го измислија припадниците на високиот, аристократски род. Денес голем број луѓе се занимаваат со планинарење, качување на карпи, но освојувањето на планинските врвови е привилегија на малкумина, меѓу кои се и богатите. Тоа изискува големи трошоци, без да се споменат и повредите, па и негативниот исход, т.е. смртта во некои случаи. Според процените, качувањето на Монт Еверест чини најмалку 35.000 долари, а може да достигне и 100.000 долари. Се плаќа и данок, кој некогаш е повисок и од врвот што е крајна цел.

ПАТУВАЊЕ

Без оглед на тоа што цените на воздушниот превоз се намалени, како и туристичките аранжмани, особено сега, кога има вирусна пандемија, поголемиот дел од луѓето не можат да си дозволат одмор кој ќе трае повеќе од седум, максимум десет-петнаесет дена, еднаш во годината. Двапати е реткост. За разлика од нив, патувањата на богаташите траат долго, т.е. нивните престои, некогаш и месец-два, до крајната дестинација одат со луксузен авион, се сместуваат во исти такви хотели, посетуваат ексклузивни ресторани… Тоа за многумина е недостижно.

 ПИЛОТИРАЊЕ

Управувањето авион е детски сон на многумина, но само малкумина имаат можност да го реализираат поради ресурсите што се неопходни за тоа. Се работи за паричните средства кои треба да се издвојат за да се научи пилотирањето, но и да се купи авион, макар и летало без мотор со кабина за едно до две седишта. За да се добие PPL (Private Pilot License), треба да се плати околу 10.000 долари за најниско ниво, а цените се баснословни и кога е сопственоста на авионот во прашање, илјадници, па и милиони долари, во зависност од видот на леталото, големината итн. Имајќи го предвид тоа, јасно е зошто само богатите можат да си ја дозволат оваа занимација.

ПОЛО

Играта со топка во која играчите јаваат на коњи и го туркаат топчето со долги стапови е џентлменски спорт, а особено е привлечен за членовите на кралските семејства. Всушност, играта е класика, во исто време и софистицирана, но скапа. Затоа можат да си ја дозволат само богатите, Од друга страна, пак, е потребна и ерудиција, за разлика од останатите спортови. Поседувањето коњ, како и редовното плаќање членарина во поло-клубот, е далеку од евтино.

СКИЈАЊЕ

Во него уживаат сите, без оглед на богатството што го имаат или немаат. Само треба да има волја, желба, страст. Постои одамна, најпрво се користело за превоз, но и за воени операции, им помагало на војниците зиме, а последните триста години се разви во рекреативна дејност под отворено небо и спортска дисциплина. Поради возбудата што ја предизвикува скијањето, додека се спуштаат по снежните падини, е омилено хоби па и на милионерите, а некои од нив поседуваат и скијачки центри. На пример, се шират гласини дека Роман Абрамович пикирал ресорт во Courchevel, познат скијачки центар во Франција, на Алпите.

ЏОГИНГ

Трчањето во бавен ритам како физичка рекреација е омилено и на богаташите и на обичните луѓе. Без оглед на тоа што преовладува мислењето дека е лесно, едноставно, сепак треба енергија, кондиција, особено ако се џогира на подолги патеки. Затоа се неопходни вежби за општа физичка состојба на организмот, способност да издржи поголеми напори. Одозгора е и здраво. Најубаво е кога ќе премине во навика. Голем број глумци, бизнисмени го практикуваат, и сите што се раководат од мислата „Во здраво тело здрав дух“.

ФИЛАНТРОПИЈА

Добротворството, човекољубивоста е, веројатно, една од карактеристиките, особините на богатите. Според информациите, повеќе од педесет отсто се лица што прават добри дела, што даваат помош, заштита, т.е. организираат акции за хумани, добротворни цели. Многумина од нив имаат и организации, фондации за парично да помагаат проекти од општествена корист. Причините се различни, а можат да бидат и субјективни, но факт е дека филантропијата изискува многу пари, кои богатите ги имаат и сакаат да ги подарат.

ЧИТАЊЕ

Се поставува прашањето дали богатите многу читаат затоа што имаат време и пари или, пак, имаат време и пари затоа што многу читале. Веројатно и едното и другото. Како-годе, тие сакаат да читаат, на поголемиот број од нив им е омилено хоби, кое не е скапо, освен ако не поседуваат огромна библиотека, дома или на работа, со ретки примероци книги. Покрај тоа, читањето ги проширува видиците, а велат и дека го прочистува духот, па и умот.

Игор Ландсберг