ЖИВОПИСЕН ГРАД СО ПРЕКРАСНИ ПАРКОВИ, КОЛАЧИ, СТАРО ВИНО, МУЗИКА И ВАЛЦЕРИ. ВО НЕГОВАТА КУЛТУРА СЕ ОБЕДИНЕТИ ИСТОРИЈАТА И ТРАДИЦИЈАТА НА МНОГУ НАРОДИ И ЕТНИЧКИ ГРУПИ, СО ШТО Е СОЗДАДЕН ИНТРИГАНТЕН, МИСТЕРИОЗЕН И ПОНЕКОГАШ ЦИНИЧЕН КАРАКТЕР НА АВТОХТОНИТЕ ЖИТЕЛИ НА АВСТРИСКАТА ПРЕСТОЛНИНА. ВИЕНА ЌЕ ВЕ ОСТАВИ БЕЗ ЗДИВ, НЕЈЗИНАТА АРХИТЕКТУРА Е НАВИСТИНА ДОСТОЈНА ЗА ЦАРСКИ ГРАД.
Виена е град синоним на австриската убавина и култура на живеење. Главен град на Австрија, 1,7 милиони жители, на второ место во светот по квалитетот на живот. Од 2001 година градскиот центар е под заштита на УНЕСКО како светско културно наследство.
Од 1867 година Виена бил главен град на тогашната Австро-Унгарска Империја, со што ја презел главната улога на политички и на културен план во тој дел од Европа. Како последица на ваквите настани, Виена е единствен главен град во светот каде што сè уште се одржува традицијата на баловите од деветнаесеттиот век. Секоја година се организираат најмалку два бала со повеќе од девет оркестри што ја дополнуваат атмосферата и амбиентот. Најпознатиот бал се одржува во надалеку познатата Виенска оперска куќа.
ЦЕНТАР НА МОЌНАТА ИМПЕРИЈА
Главниот град на Австрија блеска со своите зданија, но и со восхитувачката арт-деко архитектура. Центарот на моќната империја, со дворовите на Хофбург и Шонбрун, прекрасните палати Белведере и Шварценберг, Шпанската школа за јавање, катедралата „Свети Стефан“ и не помалку атрактивната Карлова црква, дворот и градскиот парк, државната и националната опера и театар, познатите слаткарници, кафулиња, познатото тркало во Пратер, градот на треперливиот валцер, делата на Моцарт, Бетовен, Хајдн, Штраус, плени со својот сјај и не му остава на посетителот неостварен момент.
Палатата Шонбрун, летната резиденција на кралското семејство, е една од најпопуларните туристички дестинации во градот, а вниманието го привлекува со своите внимателно зачувани градини, Куќата на палмите и зоолошката градина. Богато украсените простории и фантастичната архитектура ја прават многу привлечна и често се нарекува Мини Версај. Повеќето од собите се уредени во рококо стил, со многу позлатени елементи и кристални лустери. Собата милиони, која е украсена со индиски и персиски минијатури, се смета за најспектакуларната рококо соба во светот.
Кралската палата Хофбург, која била дом на хабсбуршката династија цели шест века, претставува импресивен врв на австриското културно наследство. Без претерување, палатата може да се нарече срце на Виена. На почетокот на минатиот век тоа било резиденција на австриските императори.
Зградата постојано минувала низ реструктуирање, што довело до создавање на величествен комплекс што личи на комплексен лавиринт. Денес делови од Хофбург се користат како официјална претседателска резиденција, а другите делови се достапни за туристите.
Во велелепната палата Белведере, денес дом на Австриската национална галерија, се сместени прекрасни богатства, како што е најголемата колекција на слики од Климт, Кокошка, Шиле.
Замокот Белведере и неговите градини се едни од најубавите барокни целини во Европа. Лукас фон Хилдебрант, познат барокен архитект, во дваесеттите години од минатиот век, по наредба на принцот Јуџин, изградил замок составен од два дела: Горен и Долен Белведере. Тој е дизајниран како летна резиденција. Денес целиот замок е на располагање на Австриската уметничка галерија. Претставува репрезентативна колекција првенствено на австриската уметност од средниот век до денес. Покрај големиот број дела на Шиле и Кокошка, галеријата Белведере денес е позната и по најголемата колекција на дела на Климт, пред сè, иконата во јуџенд стил, познатиот „Бакнеж“.
Заштитен знак на Виена, секако, се и готската катедрала „Св. Стефан“, огромното панорамско тркало на Пратер (најстариот лунапарк во Европа) и обновената Шпанска школа за јавање што се грижи за исклучително ценетата раса коњи липицанери.
Посетата во Виена е многу повеќе од посета на музеи и галерии со меѓународна репутација, меѓу другите, музејот Леополд, Музејот на модерна уметност, Архитектонскиот центар. Светската слава Виена им ја должи и на најпознатите композитори во Европа – Штраус, Моцарт, Бетовен и Хајдн, кои живееле и работеле токму тука. Градот е познат и по Виенскиот филхармониски оркестар, еден од најдобрите во светот, ансамблот на Оперската куќа и светски познатиот Детски хор што постои веќе три века.
За љубителите на шопингот неизбежна е посетата на големиот шопинг-центар „Пандорф“ и улицата „Марија Хилфрер“, вистински рај за шопинг, преполни со кафатерии, ресторани, слаткарници, стоковни куќи… Самата улица е убава за прошетка, дури и ако не се купува ништо.
Во Виена не смее да пропуштите да го пробате познатиот специјалитет „виенска шницла“, што може да се вкуси во секој ресторан со австриска кујна. Кога станува збор за традиционалната австриска кујна, треба да се има предвид дека е под влијание на унгарската, чешката, на дел од бохемиската, еврејската, како и на балканската, што ја прави исклучително разновидна. Типично традиционално јадење е „tafelspitz“, многу кревко варено говедско месо што вообичаено се служи со пире подготвено рачно, со виљушка, потоа пржено, полиено со сос од јаболко и крем, а се служи со лепчиња намачкани со мајонез. Виена е позната и по своите десерти и колачи и со прочуената и неповторлива торта „захер“, но и со омилениот пијалак на жителите на Виена, виенското кафе.
Доколку посакате да направите чекор назад во времето или да бидете дел од некоја бајка, среде природните убавини и старите градби што воодушевуваат и ги полнат сите сетила, тогаш преубавата Виена ви е на располагање…
ТОП НОВОСТИ
