СО ДОАЃАЊЕТО НА ЛЕТОТО СЕ БУДИ НЕОДОЛИВА ЖЕЛБА ЗА ИСТРАЖУВАЊЕ НА НОВИ ДАЛЕЧНИ МЕСТА И ЗА СРЕДБА СО РАЗЛИЧНИ КУЛТУРИ И ТРАДИЦИИ. ЕДНА ТАКВА ДЕСТИНАЦИЈА Е ТУРЦИЈА, ПОЗНАТА ПО ПРЕКРАСНИТЕ ДОЛГИ ПЛАЖИ, ЧИСТОТО И ТОПЛО МОРЕ, АНТИЧКИТЕ СПОМЕНИЦИ И ВКУСНАТА ТРАДИЦИОНАЛНА ХРАНА. ОДЛИЧЕН ИЗБОР ЗА СИТЕ ШТО САКААТ ДА УЖИВААТ ВО ЛУКСУЗ, НО И ЗА ОНИЕ ШТО САКААТ АКТИВЕН ОДМОР.
Постојат многу причини да ја изберете Турција за да се одморите и да се забавувате. Прекрасна земја на гостопримливи луѓе, полна со контрасти: тука Истокот и Западот се преплеле и создале заедништво, традиционална и модерна, земја со богата историја, совршена за одмор, забава и шопинг. Нејзината територија зафаќа и од двата континента, Европа и Азија, а песочните плажи, долги над 8.000 километри, ги заплискуваат водите на Егејското, Средоземното и на Црното Море.
ТИРКИЗНИОТ БРЕГ ВЕ ПОВИКУВАНА УЖИВАЊЕ
Југозападниот брег на Турција е познат како тиркизен брег или турска ривиера поради археолошките и природните убавини. Од седумте светски чуда на стариот свет, две се наоѓаат на тиркизниот брег – Храмот на Артемида во Ефес и Мавзо- лејот во Халикарнас.
Комбинацијата од медитеранската клима, топлото и кристално чистото море, плажите, планинските масиви, археолошките локалитети и уникатната природа, го прави брегот совршен избор за летен одмор.
Тука се наоѓаат најпопуларните одморалишта – Анталија, Аланија, Кемер, Бодрум, Кушадаси, Сиде, Мармарис, Патара итн. Анталија е место каде што морето, сонцето, историјата и природата создале совршена хармонија.
Главен турски град на меѓународниот туризам, секако, е Анталија! Туристите што доаѓаат од цел свет најчесто со воодушевување зборуваат за тамошното зајдисонцето.
Тука се наоѓаат планината Тахтали (2.365 м), повеќе од четири илјади антички градови, азурно сино море со бисерни плажи и пристаништа, многу музеи, модерни зданија, голем број ресторани, безброј чаршии, љубезност, насмевка и врвна услуга на сите страни… Топлиот воздух помешан со опојните мириси на зачините и на турскиот чај задолжително потсетуваат дека сте во лулката на грчката, римската, византиската и османлиската култура и архитектура.
Каде и да погледнете, ви станува јасно зошто Аталос, античкиот крал на Пергам, кога пристигнал на оваа локација по неколку децении лутање и освојување, помислил дека се наоѓа на место што најмногу потсетува на рајот и поради тоа го основал градот на кој му дал своето име. Неколку века подоцна таму живееле пирати, потоа се населиле разни племиња, Грци, Римјани, а на крајот дошле Османлиите, кои му дале источен белег. Убавините на турскиот брег, особено туристичкиот рај во Анталија, безброј пати е опишуван, а милиони задоволни посетители повторно се враќаат за да уживаат во него…
Годишно во Анталија има околу 300 сончеви денови и карактеристично блага клима. Архитектонските зданија во Анталија се неверојатни. Денес се јасно видливи трагите од многу цивилизации за кои Анталија била попатна станица. Тие оставиле свој белег на денешниот изглед на градот, кој претставува неверојатната фузија на архаични и модерни градби во урбан стил што не ги нарушуваат убавината и општиот впечаток од севкупното доживување на градот.
Калеичи (Анталија) е сместен покрај медитеранскиот брег во јужниот дел. Благодарејќи на многубројните историски споменици, близината на морето и добро воспоставената туристичка инфраструктура, областа се здоби со неверојатна популарност меѓу турските гости. Само пред неколку децении регионот Калеичи не предизвикуваше интерес кај патниците, но властите во Анталија извршија реставраторски работи на територијата и Стариот град се здоби со нов живот.
Денес, Калеичи зафаќа површина од повеќе од 35 хектари и вклучува четири области. Сега се вика Стариот град Анталија, а повеќето стари градби се зачувани речиси во оригинална форма. Пред неколку години се изврши големо реновирање во Калеичи, беа отворени кафулиња, ресторани и минијатурни хотели. Така, Стариот град стана популарен туристички центар, каде што не само што можете да ја допрете историјата на различни цивилизации туку и добро да се забавувате во локалните кафулиња.
Во стариот дел на Анталија има тесни кривулести улици со стари куќи потпрени на ѕидовите на античката тврдина, а кога ќе зачекорите во новиот дел од градот се чувствувате како да сте поминале илјада година долг пат, опкружен со најсовремени хотели, дискотеки и други атрактивни локалитети наменети за најквалитетна забава.
Во Калеичи има голем број културно-историски споменици. Археолошкиот музеј во Анталија е еден од најбогатите во светот и во него се наоѓаат најдобро зачуваните примероци на антички статуи и мозаици. При прошетката низ градот ќе наидете на портата на Адријан или Укапилар, каде што, според легендата, кралицата на Шеба поминала на пат кон Соломон.
Тука е и минарето Кешик или скршеното минаре, потоа џамијата на Аладин, која е позната по невообичаено изграденото минаре Jивли, кое датира од 13 век и е симбол на градот. Античкиот град Перж го одзема здивот. Опколен е со sидови во кои живееле околу 14.000 жители. Пространи улици, аквадукт, гладијаторска арена и огромен стадион.
Во големиот број ресторани се нуди квалитетна храна што изобилува со типично домашни и јадења поврзани со регионот. Кога се зборува за овој дел од Турција не треба да се заборават прекрасните песочни плажи, во чија близина се и водопадите што личат на пенливо млеко. Во Анталија може одблизу да се погледне турската култура и историското минато, затоа што градот се грижи за зачувување на археолошките наоѓалишта, на џамиите, црквите, медресите и амамите, кои го издржале тестот на времето.
Сигурно нема да ви биде здодевно покрај големиот број турски бањи и третманите во нив, продавниците за сувенири, бучните улици и баровите преполни со еуфорични туристи. Tуристичките одморалишта Белек на исток и Кемер на запад, како и остатокот од регионот Анталија, со импресивната планина Турус во заднина, ги хранат сите сетила. Белек се наоѓа на 30 километри од Анталија. Тоа е модерно, ново, скапо и луксузно одморалиште, новото заштитно лице на турскиот туризам и омилено место на љубителите на луксузот и спортот. Најдобрите школи за голф, како и терени се наоѓаат токму тука. Изграден е околу неколку терени за голф, располага со голем број луксузни хотелски комплекси што се протегаат на 16 километри долгата песочна плажа. Ако за летување посакувате на врвна хотелска услуга (базени, бањи и фитнес центри), тогаш Белек е вистински избор.
Гастрономската понуда е приказна сама по себе, а ќебапот е неизбежен во понудата на секој ресторан и задолжително треба да се проба специјалитетот на оригиналните креатори.
Во близина на Белек се наоѓаат античките градови Перга и Аспендос, а меѓу природните атракции што вреди да се спомене е водопадот Манавгат. Кемер е сместен меѓу тиркизните води на Средоземното Море и прекрасната планина Таурус, на прекрасна локација. Идилична дестинација е Сиде, со долги пространи плажи и антички урнатини. Неодминлива е и Аланија, град што израснал околу утврдено пристаниште и замок, од каде што лесно и брзо може да се дојде до римските урнатини на Сиде и славните водопади Манавгат.
УЖИВАЊЕ ЗА СИТЕ СЕТИЛА
Мармарис и местата околу него се познати како турска монденска ривиера. Станува збор за дестинација каде што летниот одмор најчесто го користат луѓето од високото општество. Овој регион, како и останатиот дел од земјата, изобилува со историски локалитети. Мармарис и неговиот сосед Ичмелер имаат богата понуда на модерни хотели. На марината во Мармарис може да се најдат продавници на Поло, Ралф Лорен, Келвин Клајн и многу други светски брендови. Овој крај локалното население го нарекува Беверли Хилс. Исто така, тука има и продавници со традиционални турски производи. Ако сте љубител на добрата храна, тогаш бидете сигурни дека тука можете да ја вкусите! Вечерта можете да ја поминете во некој сендвич-бар или во ресторан со локална храна или да изберете некој интернационален ресторани што нуди гурмански специјалитети. Меѓу интересните места за посета е замокот што се надвиснува на карпите над градот и гледа кон морето или шарениот покриен пазар во центарот на градот. Може да го посетите и паркот посветен на таткото на нацијата, Ќемал Ататурк.
Бодрум се наоѓа јужно од Мармарис. Овој град, покрај илјадниците туристи, го посетуваат и голем број писатели и уметници што го ценат поради специфичната архитектура, односно куќите изградени покрај падината на планината што личат на кули. Дополнителни причини да се посети Бодрум се нуркачите што ги вадат морските сунѓери и рибарите. Тука може многу лесно да се организира престојот и да се најми соба, апартман или куќа. Нема да ве остават рамнодушни малите бели куќи со многу цвеќиња на терасите што му даваат карактеристичен изглед на градот.
Бодрум е место што може да се пофали и со историско минато затоа што на неговата територија егзистирале неколку различни цивилизации и култури. Тврдината на Халикарнас е одлично зачувана и во неа е сместен археолошки музеј. Во Бодрум живеел и античкиот крал Мавзолеј, познат по тоа што си изградил голема гробница. По неговото име денес се нарекуваат големите гробници.
Местото како да е создадено за млади бидејќи во сезоната градот е многу бучен и преполн со туристи. Но во околината на градот, на оддалеченост од неколку километри, има многу помали места со хотели од две до пет ѕвезди, иако услугата и гостопримството секаде се исти. Турција ќе ви овозможи незаборавен одмор. На располагање имате дестинации што ќе ви ја исполнат секоја желба и сигурно уште додека сте таму ќе посакувате повторно да се вратите.
ТОП НОВОСТИ
