КАПЕЊЕТО ВО ТЕРМАЛНИТЕ ВОДИ НА ИСЛАНД Е СВОЕВИДЕН РИТУАЛ ЛЕКУВА И РЕЛАКСИРА. ТОА Е ЗАДОВОЛСТВО ЗА СИТЕ ВОЗРАСТИ, А ДЕНЕС НЕГОВИТЕ ПРИДОБИВКИ ГИ КОРИСТАТ И УЖИВААТ ВО НИВ СÈ ПОВЕЌЕ МЛАДИ ЛУЃЕ. ЗАРАДИ МЕСТОПОЛОЖБАТА, SKY LAGOON Е ТОЛКУ ПОСЕТЕНА ШТО ЗАДОЛЖИТЕЛНО СЕ ПРАВИ РЕЗЕРВАЦИЈА, ПА И СЕГА, ВО ЛЕТО. А, УБАВИНАТА Е ДРУГА ПРИКАЗНА, ОД КОЈА СЕ ЗАМАТУВА ПОГЛЕДОТ, ЧЕСТО И ОД ПОЛНОЌНОТО СОНЦЕ
Поларната светлина, т.е. aurora borealis, е феномен карактеристичен за нордиските земји во лето. Ги привлекува туристите од земјите во близина и од подалеку. Жителите на Исланд постојано наоѓаат нови места од чиј поглед се чувствуваат пријатно, исполнето. Sky Lagoon се наоѓа во близина на исландската метропола Рејкјавик, т.е. на пристаништето Карснес, Копавогур, на периферијата. Оддалечен е шест километри од плоштадот Хлемур. Жителите на главниот град се таму за петнаесетина минути.
ДОЖИВУВАЊЕ ШТО ДОЛГО СЕ РАСКАЖУВА
Арктичкото лето, како што се нарекува, е доживување за кое долго се раскажува. Исланѓаните, традиционално, го слават полноќното сонце, неговото доаѓање меѓу 14 и 28 јуни, со забава, музика и со својот фолклор. Во традицијата се полага и љубов, но и внимание. За летниот солстициум (краткодневица) во Sky Lagoon е ограничен бројот на посетители за да се избегне метеж. Секако, се наплатуваат ексклузивноста и глетката „од милион долари“ на северната повратна точка и на Атлантикот. Перспективата е поразлична од лагуните. Sky Lagoon е специфична поради висината. Оттаму се гледа местото каде што се соединуваат океанот и небото, илуминациски осветлено благодарение на полноќното сонце. Арктичкото лето има посебна убавина. Од водата, природно топла (38-40 степени Целзиусови), се крева пареа, а ритуалот на пливање, капење во термалната вода, се состои од седум чекори.
Придобивките од термалните води се многубројни. Топлината доаѓа од спојувањето под земјата на двете тектонски плочи северноамериканската и евроазиската. Sky Lagoon се препорачува од многу причини. Минералите во водата придонесуваат за делотворноста, влијаат врз кожата, дури и ја подмладуваат, но лекуваат и кожни заболувања. Имено, минералите ги отстрануваат отровите од телото, вршат детоксикација, ги прочистуваат дишните патишта и го олеснуваат дишењето при белодробна конгестија. Термалната вода ги блокира рецепторите на болката и таа исчезнува. Меѓу многубројните придобивки се истакнуваат и пливањето што релаксира и се зголемува енергијата. Исланѓаните веруваат дека релаксацијата произлегува од регенерацијата. Го намалува стресот, предизвикува чувство на спокојство и мир. Комбинацијата од топлина и нурнување во ладна вода е препорачлива за пријатно спиење. Нема сомнение, жителите на Исланд внимаваат на здравјето, затоа што превентивата е исклучително значајна.
Нурнувањето (имерзијата) во Sky Lagoon е дел од традицијата и се поврзува со релаксацијата и вдишувањето на свежиот океански воздух, лебдењето на површината и погледот на планината Кејлир и ритмичното бранување на океанот. Всушност, прв чекор е одењето, патот од соблекувалната до работ на бесконечноста. Вториот е понирањето во базен со ладна вода или надвор. Наводно тоа е викиншки изум. Не само што го зајакнува имунитетот туку и го забавува протокот на крв и ја оптегнува кожата. Научниците докажале дека и среќата има допирна точка со него. Препорачливи се десет секунди, максимум триесет. Третиот чекор е финска бања или сауна, од пет до десет минути, со цел да се отворат порите, да се изврши детоксикација и да се исчисти кожата. Четвртиот чекор е поврзан со ладниот воздух, маглата чија придобивка е голема. Имено, станува збор за одвоена просторија каде што се будат сетилата, се подмладува кожата и се врши подготовка за петтиот чекор. Благодарение на пилингот со морска сол и кружното движење, ексфолијацијата ја светнува кожата. Парната соба е шестиот чекор, а има јасна функција порите на кожата повторно да се отворат и таа е клучна во третманот. Истовремено се прочистуваат синусите, белите дробови, дишењето станува длабоко и лесно. Чувството е одлично. Последниот седми чекор е туширање за да се отстрани вишокот морска сол, а враќањето во термалната вода е како препородување. Уживањето во моментот е бесценето, како и во резултатите од неколкучасовното возбудливо доживување.
УЖИВАЊЕТО НЕМА ЦЕНА
Цените на пасовите се различни според тоа дали ритуалот е за еден, т.е. двајца. Има и групни пасови. За индивидуална посета пасот чини 6.990 круни (3.145 денари без ритуалот) или 9.990 круни (4.495 денари со ритуалот) или 13.990 круни (6.295 денари со ритуал, сопствена кабина и лосион). Пас за двајца е 23.990 круни (10.795 денари), во што се вклучени ритуалот, две кабини, два лосиона, пијалак (домашно вино или нешто друго на точење) и два оброка во Smakk барот. На поединците им се служи вино или пиво (исландско), со доплата, a Lagoon барот се наоѓа близу пештерата. Smakk барот е полуксузен, а такви се и јадењата. Деликатесните јадења се инспирирани од традицијата на готвење во Исланд, со модерна примеса. И служењето е такво. Несомнено, искуството е вредно за посета во Sky Lagoon, целосно. Така и впечатокот е комплетен. А, полноќното сонце е, всушност, неговата круна.
Што би рекле Исланѓаните бонус. Времетраењето е ограничено на еден и пол два часа. Деца помали од дванаесет години не можат да влезат, а до четиринаесет со придружба на повозрасни, над осумнаесет години. Во рамките на лагуната има и продавница за козметички средства. Како и сè друго во Исланд, резервациите се прават онлајн. Инспирацијата, вдахновението за Sky Lagoon, т.е. нејзин дизајн се оставината, историјата, минатото и традицијата на земјата. Очигледно се внимавало на секој детаљ. Куќите на доселениците се покриени со мочурлива трева што е одличен изолатор од студ за да се преживеат долгите, сурови зими. Таканаречениот klömbruhleðsla (тревен ѕид) е изработен од турфандата на мочуриштето што претставува своевиден градежен материјал, вклучително и капалиштето (длабоко сто и дваесет сантиметри), направено по теркот на Snorralaug во Рејкхолт (Западен Исланд), еден од четирите природни базени каде што нурнувале и Викинзите. Водата е ладна, а темелот е изработен од сечени камења. Несомнено, вреди да се посети Sky Lagoon. Полноќното сонце е неговата круна.
ТОП НОВОСТИ
