ХЈУНДАИ Е ЕДНА ОД НАЈМЛАДИТЕ КОМПАНИИ ПРОИЗВОДИТЕЛИ НА АВТОМОБИЛИ. ИАКО ПОЧЕТОЦИТЕ ДАТИРААТ ОД ПРЕД САМО 55 ГОДИНИ, ЗА ТОЈ ПЕРИОД КОМПАНИЈАТА НАПРАВИЛА ВИСТИНСКИ КВАНТЕН СКОК И ЗАТОА ДЕНЕС Е МЕЃУ ПРВИТЕ 10 ВО СВЕТОТ, А ВО 2011 ГОДИНА ПРОДАДЕ 4,05 МИЛИОНИ ВОЗИЛА И СЕ ИСКАЧИ НА ЧЕТВРТО МЕСТО
Годинава Хјундаи слави 55 години од своето постоење, а сега говориме за одделот одговорен за автомобилската индустрија. Хјундаи Инџињеринг енд Констракшн Компани е основана во 1947 година, а по 20 години, во 1967 година, е формирана Хјундаи Мотор Компани. Тоа значи дека Хјундаи слави двоен јубилеј. Двете компании ги создал Чунг Ју-Јунг, кого го опишуваат како човек со постојано немирен дух, човек што постојано е во потрага. Неговиот немирен дух го довел до тоа да продаде една од кравите на татко му и со парите да побегне од дома. Човекот што постојано бил во трка со времето и со сам себе сменил многу работни места и четири-петпати бегал од дома. Всушност, таквиот живот, сиромашен, го натерала на таков чекор.
Првите години во полнолетството ги поминал во Сеул каде што работел во продавница за ориз. Вредниот работник му станал десна рака на сопственикот. Подоцна сопственикот му ја отстапил продавницата на Чунг Ју-Јунг, кој заработувал како никогаш претходно и се грижел за изнемоштениот газда. Успешната работа траела до 1939 година. Потоа Втората светска војна му ги поматила плановите, а Јапонците му ги одзеле продавницата и трговијата со ориз. Периодот по војната и кризата во татковината Кореја ги дочекал во своја работилница за поправка на автомобили. Иако оваа работа не му била многу позната, сепак добро управувал со неа и заработил. Потоа еден период Чунг Ју-Јунг живеел мирно, но решил да основа своја градежна компанија именувана како Хјундаи Инџињеринг енд Констракшн Компани. Едноставно умеел да ја организира работата и да ги исполни ветувањата во предвидениот рок. Компанијата Хјундаи била стабилна и набрзо прераснала во една од најпрофитабилните во државата.
Во тоа време кулминирала желбата за влегување во автомобилската индустрија и тоа во нејзиното срце – Чунг Ју-Јунг сакал да произведува автомобили. Ги посетувал и ги разгледувал јапонското и американското производство затоа што сакал да дознае колку што е можно повеќе детали за автомобилите. Хјундаи Мотор Компани е основана во 1947 година и веднаш започнале забрзаните подготовки за отпочнување со производството. Првиот автомобил произведен со името Хјундаи е од 1968 година. Тоа е моделот „кортина“ што бил направен во соработка со Форд. Да не заборавиме дека повеќе години Форд имал модел со исто име. Сепак, Чунг Ју-Јунг не бил сосема задоволен, односно сакал самостојно да направи автомобил. Неговиот следен чекор бил моделот „пони“. Дизајнот го изработиле Џорџето Џуџаро и неговото студио Италдизајн, за погонската единица и за сè во однос на неа се погрижил Митсубиши, а 1975 е година за паметење. Покрај продажбата на домашниот пазар, „хјундаи пони“ се продавал во Еквадор и во земјите од Бенелукс, а од 1984 година и во Канада.
Првиот автомобил не бил наменет за САД бидејќи не ги задоволувал законските мерки за издувните гасови. Токму за тој пазар Хјундаи се подготвувал посебно и во 1986 година го претставил моделот „ексел“ (ексел/пони), со кој постигнал голем продажен резултат. Досега ниеден друг производител не продал толку автомобили во првата година од продажбата, а Хјундаи споменал над 280.000 примероци. Ваквиот резултат се должи на прифатливата цена и гаранцијата од 10 години или 160.000 километри.
Хјундаи сè повеќе финансиски зајакнувал и станал најголем во својата земја и наскоро во светот бил меѓу првите 10. Потоа се појавиле моделите „лантра“ („елантра“, зависи за кој пазар), „соната“, а со неа и теренското возило „галопер“. Моделот „пони“ бил актуелен и кај нас, а потоа го заменил моделот „аксент“. Едно време кај нас многу добро се пласирал „хјундаи купе“, вистински претставник на спортски автомобил. Денес низ Скопје има неколку модели, особено од првата генерација, кои многу добро се обновени.
Растот на Хјундаи особено бил забележителен кога откупил 51% од акциите на Киа. За оваа зделка од Хјундаи изјавиле дека секоја компанија работи според сопствени планови, иако користат исти делови, мотори и друго. Денес Хјундаи има 34 отсто од акциите во Киа.
КОЈ КОЛКУ И КОГО ПОСЕДУВА
Својот профит Хјундаи, пред сè, го остварува во Индија, Кина, САД и на четврто место се трите европски фабрики со вкупно годишно производство над 670.000 автомобили. Најголемата фабрика се наоѓа во Кореја, а најсовремената со сите најнови техничко-технолошки решенија е лоцирана во САД и чини 1,2 милијарди долари. Бразил, Русија, Чешка, САД, Турција, Кина и Индија се земјите каде што има свои фабрики покрај трите на домашен терен или вкупно 10. Според најновата статистика, минатата година Хјундаи произвел 3.558 мил. возила и со децении е меѓу првите 10 светски најголеми производители на автомобили.
Покрај солидниот квалитет и објективната цена, Хјундаи сакал да оди чекор понапред. Се насочил кон подобрување на динамичките возни својства на автомобилите и за таа цел во 2014 година го најмил Алберт Биерман, некогашен главен во БМВ Моторспорт, а претходно од оваа компанија го зајмил и дизајнерот Томас Биркле. Така, покрај квалитетот, добрата цена и привлечниот дизајн, Хјундаи нудел и врвни динамички својства.
Покрај сите наведени фактори што се секојдневје на Хјундаи, производителот се насочил кон нова забава трките. Хјундаи толку многу навлегол во спортот така што тешко може да излезе. Релито му е како добро утро а, исто така, и трките на кружните патеки. И нашиот популарен Игор Стефановски Иџе неколку години возеше „хјундаи и 30“ во европскиот и во италијанскиот шампионат за туристички автомобили. Оваа година Хјундаи е двоен светски шампионат за туристички автомобили, во класата на возачи со Микел Аскона и во класата на конструктори. Покрај релито и трките, Хјундаи напорно работи на развој на електричните погони и посебно внимание му посветува на тој што како гориво го користи водородот. Минатата година најави соработка со Епл, компанија што сака да произведува компактни електромобили во фабриките на Хјундаи и Киа. Сепак, овој план ќе се одложи бидејќи Хјундаи, иако најави, годинава се откажа од договорот со Епл. Не е само автомобилската индустрија. Хјундаи ја купи компанијата Бостон Роботикс која развива вештачка интелигенција роботи што веќе се вклучени во секојдневјето.
Хјундаи толку многу напредувал финансиски што посакал да има своја премиум марка по примерот на соседите, Јапонците. Таму Хонда ја има Акура, Нисан е сопственик на Инфинити, а Тојота на Лексус. Во 2015 година Хјундаи ја формира компанијата Џенезис Мотор и со тоа влезе во дворот на премиум класата, каде што царуваат европските, јапонските и американските марки. Во 2017 година го претстави својот прв модел „г 90“.
И во тие светски најголеми компании не е розово. Во новиов век Хјундаи беше обвинет за корупциски скандал. Главниот во компанијата беше првообвинет, а казната изнесуваше 106 милиони долари. На негово место дојде лице што, исто така, е дел од големото семејство на основачот на Хјундаи. Денес Хјундаи е присутен во 193 држави со околу 5.000 продажни места и вработува околу 37.000 лица. Покрај брзиот раст во автомобилската индустрија, треба да го спомнеме и неговото најголемо бродоградилиште во светот.
И за крај нешто за името. Хјундаи е збор што директно потекнува од корејскиот јазик, само што е малку изменет. Значењето на хјундаи е современост, нешто што й припаѓа на денешницата, модерното. Зборот „хјеондае“ е тој збор, но поради тешкотијата да го изговорат оние што не се од корејско говорно подрачје, зборот е преиначен во „хјундаи“ за да биде изговорот полесен.
ТОП НОВОСТИ
