СТОКОВНАТА КУЌА НА БУЛЕВАРОТ HAUSSMANN ВО ДEВЕТТИОТ ПАРИСКИ АРОНДИСМАН (ОБЛАСТ) Е ДЕЛ ОД СИНЏИРОТ GALERIES LAFAYETTE, ПРИСУТЕН ВО ЦЕЛИОТ СВЕТ, А БРОЈКАТА Е ВОСХИТУВАЧКА – ПЕДЕСЕТИНА ШОПИНГ-ЦЕНТРИ ЧИЈА ПРИВЛЕЧНОСТ Е НЕСОМНЕНА ПОРАДИ ЛУКСУЗОТ КАКО НИВЕН ЗАШТИТЕН СИМБОЛ. БОЖИЌНАТА (НОВОГОДИШНАТА) ДЕКОРАЦИЈА Е НЕШТО ПОСЕБНО И ДОПОЛНИТЕЛНО ЈА ПОТЕНЦИРА УБАВИНАТА НА ЕНТЕРИЕРОТ, ВКЛУЧИТЕЛНО И СТАКЛЕНАТА КУПОЛА СО ЧЕЛИЧНИ ПРИМЕСИ
Париз отсекогаш е модна престолнина, крајна дестинација на дизајнерите отсекаде, а настапот во рамките на Paris Fashion Week е борба за престиж.
Таму, во градот на светлината, Марија Антоанета го купувала најголемиот дел од гардеробата и најубавиот, се разбира, додека Коко Шанел го лансирала малиот црн фустан, задолжителното парче облека на секоја жена. Galeries Lafayette на булеварот Haussmann во дeветтиот арондисман од 1912 година, кога официјално е и отворен, важи за стоковна куќа со педигре, како што ја нарекуваат парижаните и парижанките, а нејзината ексклузивност поради луксузот придонесува за „галеријата“ да ја поистоветувваат со другите париски обележја. й припаѓа на истоимената групација која од 1960-тата е членка на Меѓународната асоцијација на стоковни куќи. Таа е прва, најстара „галерија“ во синџирот. Иако зградата каде што се наоѓа денес постои цели сто и девет години, нејзината приказна е уште подолга и датира од 1894 год. Оттогаш е идејата на Théophile Bader и братучед му Alphonse Kahn за отворање на продавница за облека во која сите купувачи ќе се чувствуваат како дома. Тоа е мотото и денес. Во наредната година ја отвориле својата галантерија на ќошот меѓу Rue La Fayette и Rue de la Chausséed’Antin во Париз. Наскоро ја купиле и целата зграда каде што се наоѓала продавницата со цел да се шират и понатаму. Така, во 1905-тата ги зеле објектите на булеварот Haussmann, бр. 38, 40 и 42, како и зградата на Rue de la Chausséed’Antin, бр.15.
Го ангажирале познатиот архитект Georges Chedanne да ја уреди внатрешноста, која била готова во 1907 г., а неговиот чирак Ferdinand Chanut ја дизајнирал стаклената купола со челични примеси, висока четириесет и три метри, во Арт Нуво стил. Такви биле и скалите. Официјално, стоковната куќа ја отвориле во октомври 1912-тата, со голема помпа. Дваесет години подоцна е реновирана во Арт Деко стил. Замислата била на познатиот архитект Pierre Patou.
Развојниот пат на Galeries Lafayette Paris Haussmann е достоен за почит, од почеток до крај. Најпрво се продавала женската облека која се произведувала во нејзината работилница, вклучително и дизајнерската што се изработувала во неа. Потоа се отворил и машки оддел, за мебел, играчки, садови, а се организирале и хепенинзи со цел да се привлечат многу посетители, купувачи. На пример, во 1919 год. се чекало ред за да се види Jules Védrines, пилотот кој слетувал на покривот.
Три години подоцна се отворила и работилница каде што се изработувал мебел, а се произведувале и штофови, тапети, килими, керамички предмети, садови на чии етикети се потпишувал декоратерот Maurice Dufrène. Стоковната куќа веднаш по завршувањето на Втората светска војна се изменила во смисла на организација, намена и слично. Во 1950-тите се правеле изложби, претставувајќи го најдоброто од соседните и другите земји во Европа и светот, а десет години потоа се лансирале колекциите на младите, нови дизајнери. Така, во 1962 г. се претставила и Laura, моден креатор, денес позната како Sonia Rykiel. Меѓу 1980-тата и 2000 година и реномираните дизајнери почнале да ги отвораат своите продавници, а сега е престижно место за прикажување на последните, најнови колекции.
Имено, секој петок во 15:00,на четвртиот кат се одржуваат ревии на брендовите чии продавници се таму, во Galeries Lafayette Paris Haussmann, а резервацијата е задолжителна.
Кога се работи за трговските марки, бројката е импресивна околу две илјади брендови се присутни во стоковната куќа на површина од седумдесет илјади квадратни метри, вклучително и дваесет и петте ресторани. Според информациите за нејзината посетеност, годишно се избројуваат околу триесет и седум милиони купувачи. Секако, за време на празниците и деновите пред нив е најмногу посетена, не само заради шопинг, туку и поради одбележувањето на соодветен, убав начин со настани, случувања што ги организираат продавниците, секоја посебно и восхитувачката декорација, незаобиколно. Така е и сега, во пресрет на Божиќ и Нова година. Украсувањето започнува во ноември, а елката е дел од нејзиниот декор. Обично се закачува на куполата. Дедо Мраз й е верен придружник. Оваа традиција е установена во 1976 год., како и поволностите што се нудат со цел да се прослават божиќните и новогодишните празници на шармантен, париски начин, исполнет со мала доза на луксуз, раскош. Во знакот на Божиќ и Нова година е буквално сè, па и доброто расположение, среќата која е забележлива на човечките лица, во нивните очи.
Посетата на Galeries Lafayette Paris Haussmann се споредува со авантура, вклучително и шопингот. Продавниците за гардероба, машка и женска, трендовска и класична, за модни додатоци, односно аксесоари (од накит до часовници), за козметички средства (природни, органски), за кожени производи, чевли, како и за детска облека, играчки.., се распоредени тематски наменски, на седум катови, а купувањето може да се комбинира и со други активности, занимации, од разгледување на уметнички дела во изложбениот простор Galerie des Galeries до пиење кафе, алкохолен пијалак или јадење во еден од неколкуте ресторани каде што може и да се научи како се приготвуваат макаронс-колачи на пример.
Готвачот Julien Sebbag ја менаџира гостилницата на покривот со поглед на Opéra Garnier, Les Invalides, Tour Montparnasse и Ајфеловата кула. Во Créatures се послужуваат медитерански деликатеси, вегетаријански, а тревките кои се користат за мирудии, заедно со јагодите, малините и јадливите цвеќиња се одгледуваат на површина од илјада квадратни метри на терасата. „Куполата“ е прекарот, другото име на Galeries Lafayette Paris Haussmann. Така ја викаат жителите на француската метропола. Иновативноста е нејзина одлика, меѓу другото. Перманентно се воведува нешто ново, како урбаното земјоделие во 2015 г., вклучително и Go For Good во 2018-тата, со цел да се зголеми одговорноста, да се подобри во смисла на одржливиот развој. Кампањата опфаќа дванаесет илјади производи од седумстотини брендови, нејзини партнери.
Стоковната куќа за која се вели дека е париски трејд-марк е, всушност, добро смислен проект за театарска драматургија на модата, како што ја нарекувале основачите, а нејзиното иконично значење може да се забележи во милионската посета на парижаните и парижанките, домашните и странските туристи – купувачите со развиено чувство за убавото, смислата за него и задоволството, уживањето во луксузот, раскошниот начин на живот. Некогаш е доволна и прошетката до Galeries Lafayette Paris Haussmann, во неа, да се разгледаат излозите, новите модни колекции на дизајнерите кои делуваат инспиративно, да се испие кафе на раат и да се осознае вистината за животот, дека неговата убавина ја чинат исклучиво малите нешта. Празниците како Нова година и Божиќ нè потсетуваат на тоа, нема сомневање. Во француската метропола, светската престолнина кога е модата во прашање или не, новиот почетокот секогаш е добредојден.
ТОП НОВОСТИ
