БОДИБИЛДИНГОТ СЕ ДЕФИНИРА КАКО СИСТЕМ ОД ВЕЖБИ СО ТЕГОВИ И ДРУГИ ПОМАГАЛА И СПРАВИ, ШТО СЕ ПРИМЕНУВА ЗА ДА СЕ ЗГОЛЕМИ МУСКУЛНАТА МАСА И ДА СЕ ОБЛИКУВА ТЕЛОТО. ЗА ДА СЕ ВЛЕЗЕ ВО НЕГОВАТА СУШТИНА ТРЕБА ДА СЕ ОБРНЕ ВНИМАНИЕ НА ДЕСЕТТЕ НАЈВАЖНИ ТОЧКИ НА КОИ СЕ БАЗИРА. СЛАВЕ ЈАНЕВСКИ Е ИНСТРУКТОР И ЛИЧЕН ТРЕНЕР ВО ФИТНЕС-ЦЕНТАРОТ „ТИТАНИУМ“. СО НЕГО РАЗГОВАРАВМЕ ОПШТО ЗА БОДИБИЛДИНГОТ, ЗАРАДИ ПРОСТОРНАТА ОГРАНИЧЕНОСТ.
(Пре)обликувањето на телото, како што вели Славе Јаневски, инструктор и личен тренер, за да се постигне целта – идеален, привлечен изглед, не е нималку едноставно. Тоа е, всушност, процес што трае долго и бара дисциплина, напорна работа, одрекување, посветеност, но и познавање на анатомијата на човекот, биохемијата и начинот на кој функционираат органите, исхраната, техниката на вежбањето, хормонската регулација и стимулација, методите на тренинзите и сл. Мускулната симетрија и пропорциите се „креираат“ со интелигентен , соодветен избор на вежби, не случајно и со среќа во изборот.
Пред да почнете да одите во фитнес-центар, однапред треба да се консултирате со инструктор, тренер, да се направи и состави план, бидејќи во спротивно, без професионално изведување на работата, освен што нема да даде плод, вежбањето може да биде и контрапродуктивно.
ГЕНЕТИКАТА ИГРА ВАЖНА УЛОГА, НО…
На мускулите им припаѓаат околу четириесет и пет отсто. Всушност, толкав е нивниот дел од вкупната телесна тежина. Коските зафаќаат дванаесет проценти. Генетиката, т.е. гените играат важна улога бидејќи тие го определуваат максималниот број мускулни влакна со кои располага човекот. Инаку, типот мускулни влака, во смисла на нивна предоминација, ја одредува предиспозицијата на човекот или за активности што бараат издржливост. Iли, пак, за активности во кои ќе дојдат до израз човечките сили.
– Генетиката ја определува и формата на мускулите што со текот на времето, како резултат на вежбањето, може да се измени. Тоа значи дека личноста што има доминантен тип на мускулни влакна е предиспонирана за подобри резултати, да биде поуспешна во активностите што бараат издржливост и траат подолго, како велосипедизмот и џогингот на пример, додека мажот или жената чии мускулни влакна се поинакви, предоминантни, ќе има поголем успех во активностите што изискуваат повеќе сила, т.е. во бодибилдингот. Дури и ако имате лоша генетичка база, основа, што значи дека вашата конституција на телото нема облик на буквата „V“, широки рамена и тесна половина, без да се испотите добро, не треба да губите надеж, бидејќи со напорна работа можете да направите многу, како за изгледот така и за своето физичко, но и духовно здравје, кое произлегува од задоволството поради изгледот и самодовербата што ја влева. Сепак, не треба да бидете преамбициозни, да се стремите кон толку високи цели што ќе се жртвувате за изглед како моделите од насловните страници. Понекогаш гените се ограничувачки фактори за остварување на соништата и целите – објаснува Славе.
Според инструкторот и личен тренер, Славе Јаневски, десетте најважни точки на кои се заснова бодибилдингот, за постигнување на целта – напредок, успех во зголемувањето на мускулната маса и во обликувањето на телото се:
· Прогресивно зголемување на тежината – Која е вашата идеална тежина? Се разбира, не телесната туку оптоварувањето што секој човек (и маж и жена) смее, треба да си го дозволи, да си го овозможи, според мислењето на инструкторот, личнот тренер, за да ја зголеми мускулната маса, да го обликува телото.
· Адекватна протеинска исхрана – Каква исхрана практикувате, колку протеини ви се потребни се најчестите прашања што си ги поставуваат вежбачите, почетниците во бодибилдингот, кои имат цел да го (пре)обликуваат своето тело. Зголемувањето на мускулната маса не е возможно доколку не се внесуваат барем 3.000 килограм – калории во текот на денот.
· Доволно сон и одмор – Сонот е доста важен од причина што ја потпомага синтезата на протеините, а исто така, и психички го подготвува вежбачот за следниот тренинг. Мускулите растат ноќе, додека спиете, а не кога вежбате. Меѓу седум и девет часа квалитетен сон му е непходно на секој вежбач.
· Избегување на стресот (Стрес- менаџмент).
· Развивање позитивен став.
· Вклучување во аеробните активности – Џогирањето, возењето велосипед, степерот, ергометарот и слично, не само што го забрзуваат метаболизмот, т.е. способноста на организмот да ги согори маснотиите (масните наслаги) туку ги отстранува и штетните нуспродукти и, најважно, овозможува побрз транспорт на кислородот и на хранливите материи до мускулите за генерирање на нивната јачина, сила и, секако растежот.
· Избегнување на преоптовареност кога е во прашање тренингот – Кога се претерува, во смисла на преминување на крајната граница, без да се обрати внимание на можностите, телото чувствува замор, а последиците се несакани, од покачување на крвниот притисок во утринските часови, проследено со главоболка, изнемоштеност, несоница, преку немање апетит, дехидрација, инфекција, повреда, до анксиозност, губење концентрација на вниманието, депресија…
· Планирање на тренинзи – Тоа е најважната точка (клучно прашање), од вкупно десет, на кои се заснова бодибилдингот, чија цел е напредок, успех во зголемувањето на мускулната маса и во обликувањето на телото. Како што вели Славе, сплит- системот (анг. split се дели) важи за најефикасен метод на вежбање со поголем интензитет во споредба со другите, кој потекнува од САД.
· Придржување кон основните „технички“ упатства на тренинзите за зголемување на мускулната маса.
· Следење на напредокот, успесите – Доколку се изостави само една компонента, целта може да изостане или да се оствари делумно. Затоа е потребно да се води сметка за сите десет точки да се исполнат, остварат кумулативно, без ниеден пропуст.
ТОП НОВОСТИ
