Денешната појава на електрични летала е нешто како „враќање во иднината“, како да се повторува времето кога човештвото сакаше да ги направи првите „воздушни чекори“. Икар, по него Јозаф и Жак Монголфие со балонот, потоа Ото Љиљантел, нивните варијации наречени дирижабли и на крајот авионите со Алберто Сантос Думон, Густав Вајтхед, браќата Рајт и други. Голем број производители се јавија со концепти, прототипови, со батерии, со горивни ќелии, но ќе помине уште многу време додека сето тоа се сертифицира. Националните агенциите што издаваат сертификати за леталата за да можат да ја извршуваат дејноста воздушен превоз, забрзано работат на воспоставување дополнителни мерки на безбедност и правила. За авионите и хеликоптерите постојат закани и правила, но не и за новиве. Најновото што се појави на крајот на февруари е леталото „луфт пиној“од Филипини, а крајот на годинава ќе се види прототип изданието. Тамошните жители имаат сериозен проблем со транспортот бидејќи нивната земја има точно 7.101 остров. До островите се доаѓа со хеликоптери, авиони и пловила, но Филипинците бараат превозно средство што ќе биде поефикасно, поекономично и да е во согласност со современите текови за заштита на животната средина.
„Луфт пиној“ всушност е еднопросторно возило, најверојатно со шест до осум седишта, кое може да се движи како секој автомобил, но кога има потреба да може вертикално да полетува и слетува. Така конструкторите го замислиле возилото, односно леталото. Возилото, како да е такси, вози по патиштата до крајбрежјето и потоа полетува за да слета на некој остров. По слетувањето возилото продолжува да се движи како и секој друг автомобил и ве носи пред врата. Вертикалните летала не ќе можат да слетуваат каде што сакаат, туку ќе има строго определени места за полетување и слетување. Според конструкторите, засега „луфт пиној“ е најдобро решение затоа што работи по принципот „од врата до врата“.
„Луфт пиној“ е дело на филипинската компанија Франциско Мотор Корпорејшн и американската работилница Луфт Кар со седиште на полуостровот Флорида. Странска компанија работи на основата, школката и внатрешноста на возилото (леталото), а филипинската компанија е изведувач на сè друго. Погонот е електричен, нема батерии, но има горивните ќелии, односно водородот ќе согорува и ќе го придвижува леталото (возилото). Ако снема водород, резервоарите може лесно да се наполнат за време подолго од полнење бензин или нафта. Зошто водород, а не батерии. Засега врв за летање со батерии е околу 400 км. Двете компании ги претставија нацртите и деталните планови, со назнака дека прототипот ќе биде готов за светска премиера до крајот на годинава.
ТОП НОВОСТИ
